تعالى فىّ اتولد

سلام ونعمة://
تعالى فيّ اتولد

النِّجم دَل المَجوس طَب وإنتوا مين دَلُّكوا
وِعَن مَكان الميلاد مين بَس كان قال لُكوا؟
روح رَبِّنا القُدُّوس هُوَّ إللى شاورلُكوا
رُحتوا ليسُوع قُلتوا له جايين نِرَحَب بيك

ما بَعَتِّش البِشارات لِملُوك ولا لحُكَّام
وماكانشى فى إستِقبالَك إلاَّ رُعاة أغناَم
راحوا شافوا طِفل صغيَّر فى قلب مِزوَد نام
غَطيت حَياتنا بمَجدَك والقَش بيغَطِّيك

لكِن يارب إحتَرت إشمِعنَى يَعنى رُعاة!
إشمِعنى دولَ إختَرت! فَهِّمنى يا الله
طَب ما الغَلابَه كتير! أرجوك عايز تَفسير
وَلا بِتحابى وَلا تفَرَّق والنَّاس واحِد فى عينيك

دى خِطَّة دَبَّرتَها وِرَسَمتَها من الأزَل
راعي .. وهُمَّ رُعاة وبيشبِهُوك فى العَمل
وكمان لأنَّك فادى جيت للرُّعاة يا حَمَل
وديع قوى ومُتَواضِع وِنزِلت مِن أعاليك

دى خِطَّة مِترَتِّبَة وِحَقيقي ليها العَجَب
قَبل الميلاد بِشوَيَّة يوسِف يروح يُكتَتَب
يروح على بيت لَحم ويتَمِّم إللى إتكَتَب
إنَّك هِنَاك تِتوِلِد دى نبوَّة تَمِّت فيك

رُعاة فى عِز الليل مِصَحصَحين وسَهَارَى
جالهُم مَلاك مـ السَّما ومعاه خَبَر وبِشارة
لو كانوا بَقى نايمين كان يبقَى ألف خسارة
دول سِهروا وأنا سَهران يارَبِّي مِستَنِّيك

قال المَلاك: إتوَلَد جُوَّه بَلَد داوود
الله وواخِد جَسَد جيه ليكوا يوفي وعود
هُوَّ المَسيح الرَّب بالحُب جاي يسُود
بِنمَلِّكَك ع القَلب وِحَياتنا آهي بنِهدِيك

قال المَلاك الخَبَر بَعديها بدقيقتين
خورس ملايكة ظَهَر وبَدأ يقول تَرانيم
جُمهُور كتير مـ النُّور مَشهَد جَميل وعَظيم
ملايكِة السَّمَوات يا يسُوع بِتُسجُد ليك

قالوا الملايكة: المَجد لِلَّه في قَلب عُلاه
وسلام لأهل الأرض بَقى ليكو تاني حَياة
بالسلام اتملا الكاس والفَرح جيه لِلنَّاس.
آمِنت بيك يا يسُوع وهاأعيش عَشان أرضيك

وَصل الرُّعاة لِلمِذوَد وعِليت الهِتافات
شافوا إللى قالوا عليه ملايكِة السَّمَوات
نايم فى حُضن العَدرا مَلفوف فى قَلب قُماط
نُونو جميل وهادي والنِّعمة باينَه عليك

يارب أنا إستَعجِبت مِن كُتر تَواضعَك
حِجر البَتول يحِملَك رغَم إرتِفاع وَضعَك
بِتِصنَع الأنهار وِتنَزِّل الأمطار
إزَّاى بَقَى تِعطَش وثَديها يسقيك!

مُمكِن آقولَّك حاجة ... حقيقي دي غريبَة
مِذوَد ده تَعبير شِيك لا مُؤاخذة دي زريبَة
يارب أنا مُندَهِش ما شُفتَهاش عِيبَة!
إسمحلي إني أنحِني وِأوَطي أبوس رِجليك

بَس الحَمَل يِتوِلِد فين غير ما بين حِملان
ماهو إنتَ جيت تِندِبِح بدالي أنا الإنسان
حَبِّيتني مِن غير سَبب ياآبو قلب كُلُّه حَنان
تَعالى فىَّ إتوِلد يا يسُوع أنا باأناديك

Click this bar to view the full image.

» تعالى بص امثال 2009